Мин сагынмам инде сине бүтән,

Ярсып хәтер киртәләрен  сүтәм.

Аерып алам кайсын, бирешмиләр,

Югалтулар белән килешмиләр.

Кушымта:

Мин сагынмам инде сине бүтән,

Хатирәләр илен ташлап китәм.

Йөгерә - йөгерә кире кайтты тизрәк

Сагынуларын җитәкләгән тиле йөрәк.

Мин сагынмам инде сине бүтән,

Күңелемдә шыткан гөлем кипкән.

Бәхет капкаларын кайрып ачып,

Өметемне көткән дә җиткән.

Юк,  сагынмам инде сине бүтән,

Ялгыз яна йөрәккәем күптән.

Исләремә төшмә, кермә төшкә,

Юата алмас инде мине үткән.